مدير المشروعات الإنتاجية بمؤسسة التنمية الاجتماعية: “قفص الذهب” مشروع أسرة منتجة بدخل شهري 410 آلاف.. و التمويل متاح لأي شخص بمستندات مبسطة.. وهناك 3 قطاعات تغطي الخرطوم وأم درمان وبحري٠

الخرطوم :مي عز الدين

كشف محمد عيد ثابت مدير المشروعات الإنتاجية بـ مؤسسة التنمية الاجتماعية، عن إطلاق حزمة من المشروعات الإنتاجية، على رأسها مشروع “قفص الذهب” لتربية الدواجن البياض بنظام البطاريات.

وقال ثابت في تصريحات لـ”اليمامة برس” على هامش مشاركتهم في جناح معرض الخرطوم الدولي قال”حقيقة احنا مطلقين عدة مشاريع انتاجية في مؤسساتنا الاجتماعية لكن أهمها مشروع قفص الدهب، مشروع بسيط تعريفه هو مشروع تربية الدواجن بنظام البطاريات”.

وأوضح أن المؤسسة صممت بطارية خاصة تختلف عن الموجود في السوق، مقاسها متر في متر، تتسع لـ 60 دجاجة بياض، بارتفاع أكبر من التصميم التجاري.

وكشف عن التكلفة والأرباح، قائلاً: “المشروع كامل بالمرابحة بتاعته بـ 8 مليون و880 ألف جنيه بقسط شهري 740 ألف جنيه، الدخل بتاعه في الشهر بيصل لحد مليون و350 ألف جنيه ده في حالة أقل تقدير للإنتاج”.

وأضاف: “الـ60 دجاجة بتنتج طبقين بيض في اليوم، احنا عملنا أقل نسبة انتاج اللي هي طبق ونص في اليوم، 45 بيضة لمدة شهر بتعمل مليون و350 ألف، لو طرحنا منها القسط بتاعنا بيتوفر للزول 610 ألف، بنشيل منها 200 ألف للأكل بيفضل ليه 410 ألف جنيه صافي ربح”.

وأكد أن النظام أوتوماتيك بالكامل ولا يحتاج لجهد يدوي، قائلاً: “البطارية جاية شغل أوتوماتيك، الزول ما بيتعامل مع الدواجن بيده، مجرد ما حط الدواجن بالقفص تاني خلاص، الأكل بيكون برة في الأكالات، الشرابات جاية أوتوماتيك، ما عليه إلا يملى الخزان، البيض بيجي لحد برة براهو، وحتى الروث ذاته ممكن يستفيد منه ويبيعه كسماد”.

وتابع: “النظام بيحفظ إنه ما يتلوث مع الأكل أو الموية، بيحفظ الدواجن، بيقلل نسبة الأمراض وبيزيد نسبة الإنتاج، مشروع مريح وما بياخد من زمنك، أي زول شغال وظيفة وداير زيادة دخل قفص الذهب هو المشروع المثالي ليه”.
ده تفريغ التسجيل الجديد يا لمى – الجزء التاني من مقابلة محمد عيد ثابت مدير المشروعات بمؤسساتنا الاجتماعية – شروط التمويل:
أكد ، أن التمويل متاح لأي مواطن لديه فكرة مشروع أو مشروع قائم يريد تنميته.

وقال اي شخص عنده مشروع داير يموله، عنده فكرة بتاعة مشروع شغال فيها داير ينميها، عنده فكرة حاسس إنها ممكن تبقى ليه سند، يجي للمؤسسة، المؤسسة بتقيف معاه بنظام التمويل العادي”.

وكشف عن متطلبات التمويل المبسطة، قائلا: “متطلبات التمويل عندنا كلها واحد، مستندات بسيطة، مستند إثبات شخصية – رقم وطني، بطاقة، جواز أياً كان – زائد صورتين فوتوغرافيات زائد شهادة سكن. إذا انت عندك مشروع حابب تشتغل فيه براك بتجيب معاه فاتورة مبدئية للحاجة اللي انت عايزها، وبتجيب معاك تاني ضامن بنفس المستندات”.

ورد على ما يشاع عن صعوبة الإجراءات، قائلا: “دايماً في ناس بيقولوا حاجاتنا صعبة، لا لا، المستندات اللي قلتها دي كلها في متناول اليد، ما في زول ما عنده، أي زول عنده مشروع يجي”.

وأوضح أن للمؤسسة ثلاثة قطاعات رئيسية تغطي ولاية الخرطوم:

• قطاع أم درمان: يضم محلية أم درمان ومحلية كرري ومحلية أمبدة.
• قطاع بحري: يضم محلية بحري ومحلية شرق النيل.
• قطاع الخرطوم: يضم محلية الخرطوم ومحلية جبل أولياء.

وعن مواقع الفروع، قال: “قطاع أم درمان في شارع الشنقيطي جوار جامعة التقانة، قطاع بحري في سوق بحري غرب طرمبة البحار الدافئة، قطاع الخرطوم شرق السجل المدني، والرئاسة بتاعتنا في بري”.

وحول نوعية المشاريع الممولة، أكد أنها تشمل كل القطاعات: “على حسب القطاعات، كل القطاعات فيها مشاريع متاحة، عندنا مشاريع القطاع الإنتاجي، مشاريع القطاع الخدمي، مشاريع القطاع التجاري، مشاريع الطاقة الشمسية، أي مشروع في راسك انت حاسس انه بيقدم ليك حاجة تعال قدم طوالي”.