اختى قالت لى رايك شنو فى موده بت جيرانا دى ..!! مانخطبا ليك …!!؟ والله بت مؤدبة…!! وبت ناس ….!! وأخلاقا كويسه ……قلت ليها ليها …. (سمحة) ..!!؟؟؟ شايفك جليتيها …!!! قالت لى ياخ السماحة تطير ..الكلام الأخلاق …!! بعدين سمحة دى بتحددا انت ما انا ..!! اها انا الكلام ده طمنى وما طمنى ..!!! باقى انا زول سماحه برضو ….!! اها قلت ليها مالو النشوفا كويس …!! انا بنات الحلة دى ماقاعد اتمعن فيهن …!! ( كضاب ياعلوب ) …اها يازول قالت لى خلاص هى بتجينا بكره انت سلم عليها وشوفا …!! قلت ليها تمام…!! اها بكره جا …وموده جات ..!! تتسحب ذي الحرامى …..!! والله اول ماشفتها كده ماريحتنى …!! ياخ البت دى اول حاجه كملانه من لحم الدنيا التقول ضارباها أنيميا…..!! قلنا مامشكله مديدة الحلبه فى …!! بعدين ذاتو لئامه كده ظاهره فى وشها ده …!!!وصرصير كده عجيب تقول مشاكلانا …!! المهم قلت ياعلوب طول بالك …!! سمحة المهله …!!!!اها وهن قاعدات فى الهول …عملت نفسى جيت مارى ..!! قلت اعمل لى جدعه كده …!! قلت ليها… بالله كيف ناس البيت ….!!!؟؟ عوجت قدوما ده …وقالت لى (كويسين )..!!….بس دي الربنا قدرا عليها …مازادتا حرف …!!! الله لاغزا فيك بركه…!! وكمان ولا عايزه تتبرع تعاين لى …!!! شوف الرويس ..!!! دخلت ومرقتا ..اختى لحقتنى قالت لى …شوفا كويس ياعلوب عشان نكلما …!! قلت ليها دقيقة…!! تكلمى منو …!!!؟ الخشبه دى …!! بعدين انت الفلهمة دى فوق ام كم …..!! قالت لى ياعلوب اول حاجه البت دى (استايل) …!! الحاجه التانيه انت قايلا بس هى بت خفيفه كده…!! مالازم تكون كده …!! قلت ليها هى لاكين فى فرق بين الخفة ..والقرفة …!! هى مالا عامله كده …!! قالت لى دى حركات بنات ساكت وعاديه ….!! انت عارف البت مابتحب تتراشق كمان ….!! قلت ليها اي بس كمان ماقدر ده …!!المهم قلت ليها انت كلميها قولى ليها علوب ده مابحب القطامة …..!! المهم الظاهر كلموها …!! يازول جيت داخل دخلتى التانيه دى والله البت التقول ادوها بنزين دورت ذي المافى حاجه ….!! لكن الطبع ده البدورو شنو !!!؟ .قلت ليها انت موده مش …!! لانو انا بعرف اختك التانيه الشغاله فى البنك ….!! اتخيلو الرد شنو …..!!؟ وانت البوديك البنك شنو..!؟؟. يعنى المعنى انت يايابا من حسابك ولا رصيدك ….!! ماقلت ليكم البت دى (عواليق) ..!! اها فى اللحظه دى انا عيونى طششن ….!! وضغطى ارتفع …..!! واعلنت الحرب ………….قلت ليها انت اكبر منها مش كده ….. ( بالكيماوي ياعلوب …) والله البت دى محل تدخل ماعرفت ….!! والعيون دى لمن جن مارقات لى بره…..!! وخلاااص المغسه كتلتا …!!! قالت لى مادام انت شايف كده يبقى انا الأكبر ….!! لكن انت لازم تشوف دكتور عيون ..!! الظاهر الكبر دخل …!!! (البت عايزه ترد القون ده …) وانا يازول أصلا قنعت من خيرا فيها ….!! قلت ليها والله انا نظرى سته على سته …..هسه انت بى ضعفتك دي برضو شايفك …..( من خاااارج المنطقة …صاروخ ارض ارض … أحلى الأهداف حتى الان …)….. اها خلاص بقت تتململ ….!! ولسانا ده اتعقد…..!! قامت قالت لى اختى بى ضحك المغسه داك …(المابتعرفو ضحك ولا بكا …!!) الظاهر انا اتهزأت الليله عندكم يامشاعر …!!!! اها اختى حسّيت بيها اتحرجت كده …..!! غايتو علوب اخوى ده اصلو مابسألو ..!! والله منجضنا نجاض جنو يكاوي ….غياظ خلاص …!! (فى محاولة لتهدئة اللعب) وطوالى غيرت الموضوع …!!! غايتو البتعرسك دى تشيل شيلتا …..!! (محاوله اخرى لاصلاح الأجواء …)….نطت (المعصعصة) دى طوالى لقت ليها طريقه للشبكة ..والله دى الا يكونو داعين عليها …!!! ولم يتاخر الرد كثيرا …. قلت ليها والله بس انشاءالله مايكونوا داعين على انا ….!! وتقع لى واحده زيك كده ….!! ( قووووون …هدف ولا احلى …ولا اجمل .ولا اروع ….شوف شوف شوف …والله اعلق واصفق …والله اعلق واصفق …!!!! ) طوالى موده بقت زولة مرقة …!! بلعت العصير ده بليع …!! وعامله فيها روحا رياضيه …!! قامت علقت ….غايتو بتلقى ليك واحده زيك …!!! محاوله لإحراز هدف مباغت …!! خلاص قنعت …!!! اها يامشاعر انا لازم امشى لانو مواعيد الجيم جات ..!!! قلت ليها يابت (الجن ) ده بكملك …..قالت لى اسمو (الجيم ) ياعلوب …!! (خلااااص يعنى البت منقطاها ولقت فرصه للتعادل ..). وهى ماعارفه قون المغربيه فى الطريق …قلت ليها انا عارفو اسمو (الجيم ). لكن بالنسبة ليك والله ياهو الجن البتسوى فيهو ده انت كلك خمسه كيلو …!!عايزه تكونى ربع كيلو يعنى ….!!! خلااااص ..خلااااص ..هدف قاتل فى دقيقه قاتله ….!! انتهى الوقت ….!! رصاصة الرحمه ياميسى انتهى كل شئ …. ….!! بالإنجليزى game over بالفرنسي fin بالألماني Endi …بالعربى …انتههههى …علمهم ياميسى ….أحسمهم ياميسى…كم انت كبير ياابن البرشا !!!!خرجت موده من الدور الاول ولن تعود …!! واختى قالت لى انا ذاتى غلطانة البخطب ليك …!! قلت ليها فى فرق بين تخطبى لي …(وتخبتى ) لى …قال موده قال ….(الفلهمة والشنا والقطامه) ..مثلث الشيطان .!!! هو قالو ليها علوب ده بس فدائي قدر ده …!! موده قال …!!! والله فلهمه ساكت وكيسا فاضى …(موده كيس المخده ..) .غايتو البت لما تكون شينه ولئيمه …تمرقك من الدنيا ونعيما …!!امشى الله لأجاب عقابك …!!! بس الكيفنى انو الليله ياعلوب اول مره تجيب ليك نقطتين …طواااالى ماخد ٣/. …والله نفسياتى ذاتا اتصلحت ….يكون ده سعد الشينه البقولوا…..!! هبوبك ياالله ….!!!!
التعليقات مغلقة.